Փաշինյանը կոչ է արել ժամը 15։00–ից դադարեցնել քաղաքացիական անհնազանդության բոլոր ակցիաները
ԵՐԵՎԱՆ, 17 մայիսի. /ԱՌԿԱ/. ՀՀ վարչապետ Նիկոլ Փաշինյանը դիմել է ՀՀ քաղաքացիներին և կոչ արել ժամը 15։00–ից դադարեցնել քաղաքացիական անհնազանդության բոլոր ակցիաները։
Նախօրեին Հայաստանում անցկացվեցին բազմաթիվ ակցիաներ Արշակունյաց և Բաղրամյան պողոտաներում, Երևանի քաղաքապետարանում, Սևանում։
«Երբ նախկինում մենք ճանապարհներ էինք փակում և անցկացնում էինք քաղաքացիական անհնազանդության ակցիաներ, ապա անում էինք դա` ելնելով այն համոզմունքից, որ Հայաստանում չկա իշխանություն, որն ի վիճակի է լսել քաղաքացիներին, ապրել իրենց ջանքերով ու պաշտպանել իրենց իրավունքները։ Սակայն հիմա հարց է ծագում` ու՞մ դեմ են ուղղված այդ անհնազանդության ակցիաները», – հայտարարեց Փաշինյանը Facebook–յան իր էջում ուղիղ եթերի ժամանակ։
Նա հույս հայտնեց, որ քաղաքացիները հասկանում են, որ անհնար է բոլոր հարցերը միանգամից լուծել։ Նա առաջարկեց քաղաքացիների խնդիրների լուծման իր տարբերակը։
«Առաջարկում եմ բոլոր քաղաքացիներին ձևակերպել սեփական պահանջներն ու խնդիրները և ներկայացնել տարածքային կառավարման և զարգացման նախարարություն։ Առաջարկում եմ նաև նամակներով կամ դիմումներով դիմել ՀՀ կառավարության նամակների ու քաղաքացիների ընդունելության բաժին կամ զանգել «թեժ գծով»` 117 հեռախոսահամարով։ Այս ամենն անհրաժեշտ է, որպեսզի մենք ծանոթանանք խնդիրների ողջ շրջանակի հետ և լուծենք դրանք ինստիտուցիոնալ ճանապարհով», – հայտարարեց Փաշինյանը։
Վարչապետը նաև նշեց, որ բողոքի ակցիաների թիվը, կառավարություն ստացվող մեծ թվով նամակները վկայում են երկրում կուտակված բազմաթիվ խնդիրների մասին, սակայն դրանց լուծման համար ժամանակ է հարկավոր։
«Մենք վերցնելու ենք բոլոր նամակները, կազմենք առաջնահերթություն, օրակարգ ու կետ-կետ անցնելու ենք բոլոր հարցերով», – հայտարարեց Փաշինյանը։
«Իհարկե, ոչ ոք չի սահմանափակում ժողովրդի ազատությունը, սակայն վստահ եղեք, որ Հայաստանում կա իշխանություն, որը կզբաղվի երկրի և ժողովրդի խնդիրների լուծմամբ, և կանի դա առավելագույնս թափանցիկ», – հայտարարեց Փաշինյանը։–0–