Հայաստանի բնակիչները կարող են անվճար միանալ արտակարգ պատահարների արագ արձագանքման «911» ծառայությանը
ԵՐԵՎԱՆ, հուլիսի 16. /ԱՌԿԱ/. Հայաստանի բոլոր բնակիչները, անկախ նրանից, թե բջջային կամ ֆիքսված կապի որ օպերատորի բաժանորդներ են, կարող են անվճար միանալ միանալ արտակարգ պատահարների արագ արձագանքման «911» ծառայությանը, հաղորդում է «ԱրմենՏել» ՓԲԸ–ի (Beeline ապրանքանիշ) մամուլի ծառայությունը։
«ԱրմենՏել» ընկերությունը (ապրանքանիշը Beeline) հայտարարում է, որ ՀՀ հանրային ծառայությունները կարգավորող հանձնաժողովի 2014 թվականի մարտի 12-ի N33Ն որոշման համաձայն` բջջային կապի բոլոր օպերատորներն, այդ թվում «ԱրմենՏել» ՓԲԸ-ն, իրենց շարժական կապի ծածկույթի սահմաններում անվճար ապահովում են իրենց և այլ օպերատորների բաժանորդների հասանելիությունն արտակարգ պատահարների արագ արձագանքման «911» և «112» ծառայությանը:
«Հանդիսանալով երկրի խոշորագույն ինտեգրված օպերատոր՝ «ԱրմենՏել» ընկերությունը ձգտում է ապահովել առավելագույնս պարզ և հարմար պայմաններ Beeline բաժանորդների համար։ Սակայն երբ խոսքը վերաբերում է մարդկային կյանքին կամ անվտանգության ապահովմանը, մենք պատրաստ ենք ապահովել անվճար հասանելիություն արտակարգ պատահարների արագ արձագանքման «911» և «112» կարճ հեռախոսահամարներին, անկախ այն հանգամանքից, թե որ օպերատորի բաժանորդին է անհրաժեշտ տվյալ ծառայությունը»,– նշել է «ԱրմենՏել» ընկերության գլխավոր տնօրեն Անդրեյ Պյատախինը։
«ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ին ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ։–0–