Հայկական կարգավորիչը սկսել է ՎԵՈՆ Արմենիա-ն Ucom-ին վաճառելու մասին դիմումի դիտարկումը
ԵՐԵՎԱՆ, 11 փետրվարի./ԱՌԿԱ/. Երեքշաբթի Հայաստանի տնտեսական մրցակցության պաշտպանության պետական հանձնաժողովը (ՏՄՊՊՀ) սկսեց դիտարկել «ՎԵՈՆ Արմենիա» ՓԲԸ-ն (Beeline ապրանքանիշ) Ucom-ին վաճառելու մասին դիմումը: Այս մասին հայտնում է telecom.arka.am հեռահողորդակցական պորտալը:
Ինչպես երեքշաբթի կայացած ճեպազրույցում նշեց ՀՀ ՏՄՊՊՀ նախագահ Գեղամ Գևորգյանը, ընկերությունները դիմում են ներկայացրել համակենտրոնացման գործարք կնքելու մասին ՝ որպես միաձուլում կամ միավորում (Ucom-ը ձեռք է բերում ՎԵՈՆ Արմենիան): Նիստը, հաշվի առնելով առևտրի գաղտնիքները, կկայանա փակ դռների հետևում:
«Նիստերի ընթացքում հանձնաժողովը կքննարկի տարբեր ասպեկտներ ՝ սկսած շուկայի մասնաբաժնից, բաժանորդների քանակից, փոփոխությունների դինամիկայից: Առայժմ որոշում չունենք, հանձնաժողովը դեռևս վերլուծում է ստացված տեղեկատվությունը», - ասաց Գևորգյանը:
Նա նշեց, որ ՀՀ ՏՄՊՊՀ-ն դիմել է 3 պետական մարմինների՝ Հանրային ծառայությունները կարգավորող հանձնաժողով, Հեռուստատեսության և ռադիոյի հանձնաժողով և Պետական եկամուտների կոմիտե՝ շուկայի ամբողջական պատկերն ու դինամիկան հասկանալու համար: Հանձնաժողովն ուսումնասիրում է նաև միջազգային շուկայում համանման գործերը, դիմել է նաև միջազգային գործընկերներին՝ Եվրոպական միջազգային ցանցին, Միջազգային մրցակցային ցանցին մասնագիտական օժանդակություն տրամադրելու համար:
ՀՀ ՏՄՊՊՀ նախագահը նշեց, որ այսօր Beeline-ը գերիշխող դիրք ունի ֆիքսված կապի շուկայում, այնպես, ինչպես Ucom-ը, և միաձուլման արդյունքում հաստատվում է, որ ֆիքսված կապի շուկայում գերիշխող դիրքի կենտրոնացումը միանշանակ կաճի, և կարող են հայտնվել մենաշնորհային դիրքեր:
Նա նշեց, որ հանձնաժողովը ստացել է աուդիտորական հաշվետվություններ և գնահատում է ընկերությունների ֆինանսական իրավիճակը և դրանց կորուստները, ինչպես նաև հնարավոր պատճառները `վատ կառավարում, կապիտալի փոխանցում, շուկայի պահանջարկի իջեցում և այլ ասպեկտներ:
Միևնույն ժամանակ, չի բացառվում, որ ՏՄՊՊՀ-ն վաճառքի մասնակի թույլտվության որոշում կկայացնի, օրինակ, բացառությամբ ֆիքսված ցանցի, այնուամենայնիվ, գործարքն ավարտին հասցնելու համար կպահանջվի երկու ընկերությունների համաձայնությունը, այսինքն այն, թե որքանով են նրանք պատրաստ գործարք կատարել:
Նրա խոսքով, հնարավորություն կա նաև թույլ տալ վաճառքը, բայց պարտավորեցնել ընկերությանը ծառայությունների մի մասը վաճառել մեկ այլ օպերատորի, կամ հնարավորություն ընձեռել կիսել մի շարք ենթակառուցվածքներ:
ՏՄՊՊՀ-ն դիմումը քննարկելու համար ունի 90 օր՝ դիմումը ներկայացնելու պահից (դիմումը ներկայացվել է 2019 թվականի դեկտեմբերի 30-ին): Ընդ որում, ուսումնասիրվում են նաև գնորդ ընկերության իրական բաժնետերերը և սեփականատերերը:
2019 թ.-ի դեկտեմբերի 27-ին ՎԵՈՆ Արմենիան, որին պատկանում է Beeline ապրանքանիշը, դիմել է Հանրային ծառայությունները կարգավորող հանձնաժողով ՝ Ucom-ին բաժնետոմսերը վաճառելու թույլտվություն ստանալու համար: Ավելի ուշ երկու ընկերություններն էլ պաշտոնապես հաստատեցին հնարավոր գործարքի շուրջ բանակցությունների առկայությունը:
Ներկայումս Հայաստանի բջջային կապի շուկայում գործում է երեք օպերատոր՝ Ucom, «ՎԵՈՆ Արմենիա» (Beeline ապրանքանիշ) և Վիվա-ՄՏՍ (նախկինում՝ ՎիվաՍել-ՄՏՍ)։
«ՎԵՈՆ Արմենիա» ՓԲԸ-ն (Beeline ապրանքանիշ) «ՎԵՈՆ» ընկերությունների խմբի մի մասն է, որն աշխարհի խոշորագույն ինտեգրված օպերատորներից մեկն է: 2007թ.–ի ապրիլից «ՎԵՈՆ Արմենիա» ՓԲԸ–ի 100% –ը (ավելի վաղ «ԱրմենՏել» ՓԲԸ) պատկանում է Veon ընկերությունների խմբին։ «ՎԵՈՆ Արմենիան» տրամադրում է ֆիքսված և բջջային կապի ծառայություններ։
Ucom ընկերությունը Հայաստանում 2009թ. սկսած կառուցել է գերժամանակակից օպտիկամանրաթելային ցանց, որը հնարավորություն է տալիս մեկ կապուղով մատուցել երեք ծառայություն՝ ինտերնետ, հեռուստատեսային ծառայություն և հեռախոսակապ: 2015թ. հունիսի դրությամբ ընկերությունն ունի ավելի քան 100 000 բաժանորդ և 800-ից ավելի աշխատակից: Համագործակցելով համաշխարհային գերհզոր ընկերությունների հետ` Ucom–ը կարողացել է իր հաստատուն դիրքը գրավել Հայաստանի հեռահաղորդակցման շուկայում:-0-