Ադրբեջանցի հակերները կոտրել են Նիկոլ Փաշինյանի կայքը
ԵՐԵՎԱՆ, 18 հոկտեմբերի./ԱՌԿԱ/. Ադրբեջանցի հակերներն այսօր կոտրել են ՀՀ վարչապետ Նիկոլ Փաշինյանի կայքի ռուսալեզու տարբերակը։
«Մամուլի հաղորդագրություններ» բաժնում հոկտեմբերի 10–ի նյութերը բացելիս կարելի էր տեսնել Ադրբեջանի նախագահ Իլհամ Ալիևի տեսանյութն ու տեքստային հայտարարությունը`«Ղարաբաղն Ադրբեջան է և բացականչական նշան»։
Այս պասհին Ալիևի այսպես կոչված «հայտարարությունը» հեռացվել է կայքից։
Հոկտեմբերի սկզբին Ալիևը «Վալդայ» համաժողովի նիստի ժամանակ պատասխանել է ավելի վաղ ՀՀ վարչապետ Նիկոլ Փաշինյանի առաջարկած բանաձևին այն մասին, որ ղարաբաղյան հակամարտության կարգավորումը պետք է ընդունելի լինի Հայաստանի, Ադրբեջանի և Արցախի ժողովուրդների համար։ Ալիևը հայտարարել է, որ «Ղարաբաղն ադրբեջանական տարածք է։ Այնպես որ Ղարաբաղն Ադրբեջան է և բացականչական նշան»։
ՀՀ վարչապետ Նիկոլ Փաշինյանը, օգոստոսի 5–ին ելույթ ունենալով Ստեփանակերտում, բազմաթիվ անգամ կրկնել է «Արցախը Հայաստան է և վերջ» արտահայտությունը։–0–