ATEME ընկերությունը «Տելեկոմ Արմենիա»-ին կտրամադրի IP հեռուստատեսության նոր պլատֆորմ
ԵՐԵՎԱՆ, 3 օգոստոսի./ԱՌԿԱ/. Տեսահեռարձակման, կաբելային հեռուստատեսության, DHT, IPTV և OTT լուծումների առաջատար ATEME ընկերությունը այսօր հայտարարեց «Տելեկոմ Արմենիա»-ի (ապրանքանիշը՝ Beeline) հետ նոր պայմանագրի կնքման մասին, հաղորդում է «Տելեկոմ Արմենիա» ընկերության մամուլի ծառայությունը:
«Տելեկոմ Արմենիա»-ն որոշում է կայացրել արդիականացնել առկա համակարգը և գործարկել հեռուստատեսային ծառայությունների նորացված պլատֆորմ:
«Մեզ անհրաժեշտ էր հզոր, մասշտաբային ենթակառուցվածք վիդեո բովանդակություն մատուցելու համար: ATEME-ն ընտրվել է որպես վերջնական OTT լուծումների միասնական մատակարար ՝ ալիքների ընդունումից մինչև բովանդակության առաքման ցանց: Մենք նախատեսում ենք բարելավել մեր հեռուստատեսային պլատֆորմի աշխատանքը այնպիսի լուծումներով, որոնք կբարձրացնեն հիբրիդային IPTV / OTT ծառայությունների գործառնական արդյունավետությունը և հիմք կդառնան ապագայում նոր ձևաչափերով հեռարձակման հնարավորությունների ներդրման համար: Բացի այդ, ATEME ընկերության լուծումներն ունեն այնպիսի առավելություններ, ինչպիսիք են տեսանյութերի բարձր որակը և տրաֆիկի խնայողականությունը՝ առանց որակի կորուստի: Նոր պլատֆորմը մեզ հնարավորություն կտա HD և UHD (4K) հեռուստատեսային բովանդակություն հասցնել հաճախորդին բարձր որակով և նվազագույն ուշացումներով», - նշեց «Տելեկոմ Արմենիա» ընկերության տեխնիկական տնօրեն Գևորգ Գևորգյանը:
«Բիզնեսի զարգացմանը ուղղված որոշումներում մենք առաջնահերթություն ենք տալիս օգտատերերի հարմարավետությանը՝ հաշվի առնելով հեռուստաբովանդակության ստեղծման փոխակերպումը ինչպես նաև վճարովի հեռուստատեսության և OTT-ի միջև նվազող տարբերությունը: «Տելեկոմ Արմենիա»-ն մշակում է երկարաժամկետ ռազմավարություն, որը կօգնի ընկերությանը ներգրավել և պահպանել հեռուստադիտողների մեծ լսարան, և մենք ուրախ ենք օժանդակել այս նպատակի իրագործմանը», - ասել է ATEME ընկերության ԱՊՀ երկրների վաճառքի գծով տնօրեն Բորիս Յուրինը:
Ձեռք բերված համակարգը ներառում է TITAN պլատֆորմը՝ տվյալների սեղմման, ալիքների ստեղծման և ընդունման, NEA-ն՝ տվյալների ձևավորման համար, տեսանյութ ըստ պահանջի (VOD), հետաձգված դիտման տեխնոլոգիա և CDN՝ բովանդակության առաքման ցանց:
ATEME-ն հեռուստատեսային ծառայություններ մատուցողներին տրամադրում է IPTV և OTT ցանցերում տվյալների հոսքերի տեղափոխման միասնական հարթակ՝ հնարավորություն տալով օպտիմալացնել գործընթացները և բարձրացնել համակարգի արտադրողականությունը:
«Team» հեռահաղորդակցական ընկերության (ապրանքանիշը` TEAM. Telecom Armenia) հիմնադիրներն են Հայկ և Ալեքսանդր Եսայանները, որոնք եղել են Ucom ընկերության հիմնադիրներն ու երկար ժամանակ ղեկավարել են ընկերությունը։ Նոր ընկերությունը գրանցվել է 2020թ.–ի ապրիլի 20–ին «AllNet» անունով, հետո անվանափոխվել է «TEAM»–ի և ՀԾԿՀ–ից հեռահաղորդակցական ոլորտում գործունեություն իրականացնելու արտոնագիր է ստացել։
VEON Ltd հեռահաղորդակցական և ինտերնետ ծառայությունների ոլորտի համաշխարհային փրովայդերը 2020թ.–ի հոկտեմբերի 29–ին հայտարարեց, որ Team ընկերության հետ համաձայնագիր է կնքել «ՎԵՈՆ Արմենիա» ՓԲԸ–ի (ապրանքանիշը` Beeline) հայկական դուստր ընկերության վաճառքի մասին։ 2020թ.–ի նոյեմբերի 16–ին ընկերությունը հայտնեց, որ «ՎԵՈՆ Արմենիան» ստացել է նոր իրավաբանական անվանում` «Տելեկոմ Արմենիա» ՓԲԸ։ Ընկերությունը դեռ կշարունակի հանդես գալ և ծառայություններ մատուցել Beeline ապրանքանիշի ներքո։–0–