ՎիվաՍել-ՄՏՍ-ը «Ինտերնետ էքսպրես» USB մոդեմն այժմ հասանելի է դարձրել նաև 3G ցանցի համար

ԵՐԵՎԱՆ, 1 հոկտեմբերի. /ԱՌԿԱ/.  ՎիվաՍել-ՄՏՍ բջջային օպերատորն «Ինտերնետ էքսպրես 50» սակագնային պլանի բաժանորդների համար  4G/LTE ցանցում գործող «Ինտերնետ էքսպրես» USB մոդեմը հասանելի է դարձրել նաև 3G ցանցում, «ԱՌԿԱ» գործակալությանը հայտնեցին ընկերության մամուլի ծառայությունից։

ՎիվաՍել-ՄՏՍ-ն առաջարկում է «Ինտերնետ էքսպրես» հետվճարային սակագնային պլանի երկու տարբերակ, որոնք ֆիքսված ամսավճարի դիմաց տրամադրում են անսահմանափակ գերարագ ինտերնետ ՎիվաՍել-ՄՏՍ-ի 4G/LTE ցանցում: Ընդ որում, մեկ տարով բաժանորդագրվելու դեպքում «Ինտերնետ էքսպրես» մոդեմը տրամադրվում է անվճար:

VivaCell-MTS–ը 2012 թվականի նոյեմբերին գործարկել է «Ինտերնետ էքսպրես 50» սակագնային փաթեթը` ընկերության 4G/LTE ցանցում` ապահովելով Ինտերնետի` մինչև 50 Մբիթ/վրկ արագություն։

ՎիվաՍել-ՄՏՍ-ը (Ղ-Տելեկոմ ՓԲԸ) Հայաստանի շարժական կապի առաջատար օպերատոր է, հայկական շուկայում աշխատում է 2005 թվականից։ Ընկերության բաժնետոմսերի 80 տոկոսի բաժնետերը Ռուսաստանի և ԱՊՀ բջջային խոշորագույն օպերատոր` «Մոբիլնիե Տելեսիստեմի» ԲԲԸ–ն է, մնացած 20 տոկոսը պատկանում է Fattouch Group լիբանանյան ներդրումային ընկերությանը։ -0-