Հայաստանի տարածքային կառավարման նախարարության կայքը տեղեկատվության թափանցիկության առումով առաջատարն է

ԵՐԵՎԱՆ, 17 մայիսի. /ԱՌԿԱ/. Հայաստանի տարածքային կառավարման նախարարության կայքը տեղադրված տեղեկատվության թափանցիկության առումով գերատեսչությունների և կառավարությանն առընթեր գործող կառույցների առաջատարն է, հինգշաբթի ասուլիսում հայտարարեց Խոսքի ազատության պաշտպանության կոմիտեի նախագահ Աշոտ Մելիքյանը՝ ներկայացնելով կոմիտեի հաշվետվությունը:

Փետրվարի 15-ից մարտի 15-ն անցկացված դիտրակման ընթացքում ուսումնասիրվել է պետական կառույցների 52 կայք: Դիտարկումն իրականացվել է 4 չափանիշով՝ կայքում տեղեկատվության առկայությունը, դրա լիարժեքությունը, օպերատիվությունը և տեխնիկական առումով հասանելիությունը:

Նրա խոսքերով՝ տեղեկատվության թափանցիկության առումով կայքերի առաջին հնգյակում հայտնվել են նաև տրանսպորտի և կապի, տնտեսական մրցակության պաշտպանության պետական կոմիտեի, կրթության և գիտության նախարարության, Կենտրոնական բանկի կայքերը: 

Մելիքյանը նշեց, որ վարկանիշի վերջնագծում արտակարգ իրավիճակների նախարարության և հեռուստատեսության և ռադիոյի ազգային հանձնաժողովի կայքերն են:

«Հայաստանի նախագահի կայքը հավաքել է ընդամենը 28,91%, ինչը բավականին ցածր ցուցանիշ է: Իսկ գլխավոր դատախազության կայքի ցուցանիշը կազմում է 55.58%», - հայտնեց նա: 

Կոմիտեի նախագահը նշեց, որ կայքերի մեծ մասի հիմնական թերությունը տվյալ մարմնում թափուր աշխատատեղերի առկայության, բյուջետային միջոցների ծախսերի, դրանցում ստուգումների արդյունքների մասին տեղեկատվության բացակայությունն է:--0--