Երևանում տեղի է ունեցել Հայոց ցեղասպանության 100–րդ տարելիցին նվիրված պաշտոնական կայքի շնորհանդեսը
ԵՐԵՎԱՆ, 30 հունվարի. /ԱՌԿԱ/. Ուրբաթ Երևանում տեղի է ունեցել Հայոց ցեղասպանության 100–րդ տարելիցին նվիրված միջոցառումները համակարգող պետական հանձնաժողովի պաշտոնական կայքի (armeniangenocide100.org) շնորհանդեսը։
«Կայքը հասանելի է այսօրվանից հայերեն, ռուսերեն և անգլերեն տարբերակներով», – լրագրողներին ասաց նախագծի համահեղինակ Հարություն Բերբերյանը։
Նրա խոսքերով` կայքում կան բաժիններ, որոնք պատմում են Հայոց ցեղասպանության և մշակութային ցեղասպանության մասին։
«Կայքի այցելուները կարող են իմանալ, թե ինչ է Հայոց ցեղասպանությունը` ծանոթանալով կայքում հրապարակված տեղեկատվությանը», – նշեց Բերբերյանը։
Նա ընդգծեց, որ «Պատմիր քո պատմությունը» բաժնում յուրաքանչյուր հայ, անկախ իր գտնվելու վայրից, կարող է կայքի այցելուներին պատմել ջարդը վերապրած իր նախնիների պատմությունը։
«Կայքում տեղադրված է նաև տեղեկատվություն այն պետությունների մասին, որոնք աջակցել են Հայաստանին և ճանաչել են Հայոց ցեղասպանությունը», – նշեց Բերբերյանը։
Բացի այդ, նոր կայքում ներկայացված են Հայոց ցեղասպանությանը նվիրված տեսադարան, լուսանկարների արխիվ, գրքեր և վիզուալ նյութեր։
Հայոց Ցեղասպանությունը ХХ դարի առաջին ցեղասպանությունն է։ Թուրքիան ավանդաբար մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի կողմից արվող քննադատություններին։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, Գերմանիան, Հոլանդիան, Սլովակիան, Շվեդիան, Շվեյցարիան, ԱՄՆ 42 նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Կանադայի խորհրդարանի համայնքների պալատը և Լեհաստանի սեյմը, Վատիկանը, Եվրախորհդարանը, Եկեղեցիների համաշխարհային խորհուրդը։ -0-