Չինաստանի իշխանությունները կբացեն հասանելիությունը սոցցանցերին, սակայն միայն Շանհայում

ԵՐԵՎԱՆ, 24 սեպտեմբերի. /ԱՌԿԱ/. Չինաստանի իշխանությունները կհանեն արևմտյան փակ ինտերնետ կայքերի, մասնավորապես` Facebook, Twitter սոցցանցերի, New York Times տեղեկատվական կայքի նկատմամբ քաղաքացիների հասանելիության արգելքը։ Սակայն ցանցերը հասանելի կլինեն միայն Շանհայի Ազատ առևտրի գոտու սահմաններում, գրում է ՌԲԿ–ն` հղում անելով South China Morning Post հոնկոնգյան թերթին։

Չինաստանի իշխանությունները թույլ կտան օտարերկրյա հեռահաղորդակցական ընկերություններին մուտք գործել ներքին ազգային շուկա։ ՉԺՀ–ում կապի ծառայություններ մատուցող China Mobile, China Unicom և China Telecom ընկերություններին արդեն իրազեկել են արևմտյան օպերատորների հետ մրցակցության մասին։

Չինական ընկերությունները չեն վիճարկել այդ որոշումը, քանի որ այն հավանության է արժանացել իշխանությունների, մասնավորապես Պետխորհրդի վարչապետ Լի Կեցյանի կողմից։ Քաղաքական գործչի կարծիքով` դա թույլ կտա Ազատ առևտրի շանհայյան գոտին վերածել ֆինանսական և տնտեսական բարեփոխումների գլխավոր տարածքի։

Հիշեցնենք, որ Facebook–ն ու Twitter–ը 2009 թ.–ից արգելքի տակ էին գտնվում։ Ինտերնետ տեխնոլոգիաների զարգացման հետ կապված Պեկինի մտահոգությունն աճեց Մերձավոր Արևելքի երկրներում բռնկված հեղափոխությունների ֆոնի ներքո։ Հենց սոցցանցերը հեղաշրջումների կատալիզատորներ դարձան։–0–