Beeline-ը փոխել է մի շարք բաժանորդների Hi-line ինտերնետ ծառայության վճարման համարները

ԵՐԵՎԱՆ, 21 հունիսի. /ԱՌԿԱ/. «ԱրմենՏել» ՓԲԸ-ն (ապրանքանիշը` Beeline) տեղեկացնում է, որ մի շարք բաժանորդների Hi-line ծառայություները տեղափոխվել են նոր պլատֆորմ, ինչի հետ կապված կփոխվեն ինտերնետ ծառայությունների համար վճարման նրանց անհատական համարները:

Ինչպես տեղեկացրել են ընկերության մամուլի ծառայությունից, 2016 թ. հուլիսի 2-ից հետո նոր պլատֆորմ տեղափոխված Երևանում գտնվող Hi-line ծառայության բոլոր այն բաժանորդներին, ում քաղաքային հեռախոսահամարը սկսվում է «2»-ով (010-2ххххх), ինչպես նաև Զարյան 74, Քեռու 35 և Կոմիտաս 62 հասցեներում գրանցված բաժանորդներին անհրաժեշտ է նախքան ինտերնետ կապի համար վճարելը դիմել Beeline–ի մոտակա գրասենյակ:

Բաժանորդները կստանան ինտերնետի նոր համար և միայն նոր համար ստանալուց հետո կարող են վճարում կատարել ընկերության գրասենյակներում կամ վճարման այլ տերմինալների և համակարգերի միջոցով:

«Ինտերնետի հին համարով վճարումները վավերական չեն համարվի, և ծառայության մատուցումը կդադարեցվի», - ընդգծել են մամուլի ծառայությունից:

«ԱրմենՏել» ՓԲԸ–ն (ապրանքանիշը` Beeline) 2006 թ.–ի նոյեմբերի 3–ին ներառված է «ՎիմպելԿոմ Լթդ» ընկերությունների խմբի կազմում, որը ձեռք է բերել ընկերության բաժնետոմսերի 90 տոկոսը։ 2007 թ.–ի ապրիլից «ԱրմենՏել» ընկերության բաժնետոմսերի 100 տոկոսը պատկանում է ռուսական ընկերությանը։ «ԱրմենՏելը» տրամադրում է ամրակցված (ավելի քան 650 հազար բաժանորդ) և բջջային կապի (ավելի քան 780 հազար բաժանորդ), ինչպես նաև երկրի ողջ տարածքում բարձր արագության ինտերնետի ծառայություններ։ –0–