Սոցիալական ցանցերը վերջնականապես գրավեցին հայկական լրատվական դաշտը. փորձագետ
ԵՐԵՎԱՆ, 26 նոյեմբերի. /ԱՌԿԱ/. Սոցիալական ցանցերը վերջնականապես գրավեցին հայկական լրատվական դաշտը, կարծում է տեղեկատվական անվտանգության փորձագետ Սամվել Մարտիրոսյանը:
«Այսօրվա դրությամբ հայկական լրատվական դաշտը շատ տարատեսակ է առաջարկվող ռեսուրսների քանակով, իսկ մյուս կողմից զրկված է այդ բազմազանությունից, քանի որ ամբողջ դաշտը պտտվում է միայն մեկ սոցիալական ցանցի` մասնավորապես Facebook-ի, շուրջ»,- երեքշաբթի լրագրողներին ասաց Մարտիրոսյանը:
Ըստ նրա` եթե այդ սոցիալական ցանցն անջատվի մի քանի օրով, ապա իրենց որպես լրատվություն ներկայացնող 200 ռեսուրսների հիմնական մասը կկորցնի իր օգտատերերին, ովքեր միայն ցանցի միջոցով են նրանց գտնում:
Ընդհանուր առմամբ, ինչպես կարծում է փորձագետը, միտումներն այնպիսին են, որ լրատվությունը միաձուլվում է ցանցի հետ, և արդեն դժվար է տարբերել թերթերը ռադիոյից կամ ինտերնետ կայքերից, քանի որ «գոյատևելու» համար ԶԼՄ-ները պետք է աշխատեն լայն հատվածում:
«Օգտատերերն արդեն ոչ միայն ցանկանում են նորություններ կարդալ, այլ նաև լուսանկարներ և տեսանյութեր դիտել, որի կապակցությամբ աճում է մուլտիմեդիոն ռեսուրսների զարգացման անհրաժեշտությունը»,-ասաց Մարտիրոսյանը:
Նա նշեց նաև, որ արտասահմանյան ԶԼՄ-ները վերջին շրջանում փորձում են սոցիալական ցանցերն օգտագործել ոչ միայն որպես իրենց տեղեկատվության տարածման աղբյուր, այլ նաև իրենց կոնտենտի հարստացման համար, այն դեպքում, երբ Հայաստանում այդ դաշտը շատ յուրահատուկ է, և ցանցում մարդու կարգավիճակը կարող է նորություն դառնալ մեդիառեսուրսների համար:
Փորձագետը կարծում է նաև, որ ռեսուրսների այդ քանակի դեպքում միջին վիճակագրական օգտատերը բախվում է տեղեկատվության մեծ ծավալում կողմնորոշման խնդրի հետ, և համաշխարհային միտումներն ընթանում են դեպի խորհրդատվական ծառայությունների ձևավորում, որոնք կօգնեն նորությունների ժապավեն ընտրել` ելնելով օգտատերի նախապատվություններից: -0-