Հայաստանին սպասվում է փայլուն ապագա AI ոլորտում․ բարձր տեխնոլոգիաների ոլորտում համաշխարհային ներդրման համար ՀՀ պետական մրցանակի դափնեկիր
ԵՐԵՎԱՆ, 14 հոկտեմբերի․/ԱՌԿԱ/․ Հայաստանին սպասվում է փայլուն ապագա արհեստական բանականության ոլորտում, կարծում է Analog Devices Inc. (ADI) ընկերության գործադիր տնօրեն և խորհրդի նախագահ, բարձր տեխնոլոգիաների ոլորտում համաշխարհային ներդրման համար ՀՀ 2025 թվականի պետական մրցանակի դափնեկիր Վինսենթ Ռոշը։
«Դուք անցյալում ապացուցել եք ձեր կարողությունների հզորությունը ավիատիեզերական ոլորտում՝ կարևորագույն դեր խաղալով ռազմական և գիտական տեխնոլոգիաների զարգացման գործում: Ձեր գիտելիքները մաթեմատիկայի, ֆիզիկայի, հեռահաղորդակցության, էլեկտրոնային ինժեներության և համակարգչային գիտության ոլորտներում շատ ամուր հիմք են ստեղծում՝ բանականության նոր դարաշրջան համարձակորեն մտնելու համար», - ասաց Ռոշը IX Silicon Mountains 2025 գագաթնաժողովի ժամանակ:
Նրա խոսքով՝ Հայաստանը հարգանքի տուրք է մատուցում ավանդույթներին, ընդլայնում է STEM և արհեստական բանականության ծրագրերը դպրոցներում և համալսարաններում, համատեղում է արվեստը, հումանիտար գիտությունները և թվային հմտությունները, օգտագործում է փայլուն և տաղանդավոր սփյուռքի ուժը։
«Դուք՝ այս սրահում և դրանից դուրս գտնվող ստեղծագործողներն ու նորարարները, հնարավորություն ունեք այս կարևոր պահին թողնելու ձեր ուրույն հետքը Հայաստանի ապագայում։ Ես հավատում եմ, որ Հայաստանի ստոիկ պատմության հաջորդ գլուխը իսկապես կգրվի ձեր կողմից», - ասաց Ռոշը։
Հոկտեմբերի 14-ին Երևանում անցկացվեց «Silicon Mountains 2025» 9-րդ գագաթնաժողովը՝ «Anatomy of Artificial Intelligence» թեմայով։ Միջոցառմանը մասնակցել է ավելի քան 800 մասնակից և միջազգային մակարդակի ավելի քան 10 բանախոս ։
Silicon Mountains–ն ամենամյա տեխնոլոգիական գագաթնաժողով է, որը 2019թ․–ից կազմակերպվում է UEICT-ի (ՀՀ տեղեկատվական և հաղորդակցության տեխնոլոգիաների գործատուների միություն) կողմից՝ Բարձր տեխնոլոգիաների նախարարության աջակցությամբ ։
Նպատակն է միավորել տեղական և միջազգային փորձագետների, ձեռնարկատերերի, տեխնոլոգների և իշխանության ներկայացուցիչների՝ քննարկելու տեղեկատվական տեխնոլոգիաների, նորարարության, արհեստական բանականության, թվային ենթակառուցվածքների, անվտանգության և այլ ոլորտների առանցքային միտումները։