Հայաստանի էկոնոմիկայի նախարարությունն այսուհետ կօգտվի Microsoft–ի բացառապես արտոնագրված ծրագրերից

ԵՐԵՎԱՆ, 22 հոկտեմբերի. /ԱՌԿԱ/. Հայաստանի էկոնոմիկայի նախարարությունը կդառնա պետության առաջին գերատեսչություններից մեկը, որը կօգտվի Microsoft–ի բացառապես արտոնագրված ծրագրային փաթեթներից, «ԱՌԿԱ» գործակալությանը հայտնեցին գերատեսչության մամուլի ծառայությունից։

Հաղորդագրության համաձայն` համապատասխան պայմանագիր է կնքվել Հայաստանի էկոնոմիկայի նախարարության և «Մայքրոսոֆթ» ընկերության միջև:

«Սա կարող է հերթական հաջողված քայլը հանդիսանալ՝  ՀՀ կառավարության և «Մայքրոսոֆթ» կորպորացիայի միջև 2007թ. ստորագրված պայմանագրի իրագործման ուղղությամբ»,– ասվում է հաղորդման մեջ։

«Մայքրոսոֆթ» կորպորացիան Հայաստանի հետ համագործակցում է 2007 թվականից՝ Էդինբուրգում (Շոտլանդիա)  2007 թվականին ստորագրված պայմանագրի շրջանակում, որի համապատասխան՝ ընկերությունը Հայաստանում իրականացնում է կրթության, առողջապահության, սոցիալական, էլեկտրոնային կառավարման, մտավոր սեփականության պահպանման մի շարք ծրագրեր,  իսկ հայկական կառավարությունը պարտավորվում է կիրառել միայն արտոնագրված փաթեթներ և ջանքեր գործադրել Հայաստանում հեղինակային իրավունքների պաշտպանության համար։ -0-