Ucom-ը և Armflix-ը ներկայացրեցին «13 վայրկյան» բազմասերիանոց ֆիլմը
ԵՐԵՎԱՆ, 15 դեկտեմբերի․/ԱՌԿԱ/․ Ucom-ի և Armflix-ի համատեղ արտադրությամբ ստեղծված նոր բազմասերիանոց «13 Վայրկյան» ֆիլմի փակ ցուցադրությունը տեղի ունեցավ «Կինոպարկ»-ում։ Նոյեմբերի 18-ից ֆիլմը հասանելի է Uplay հարթակի բաժանորդների համար։
«13 Վայրկյան»-ը միախառնում է դետեկտիվ և կատակերգական ժանրերը՝ ներկայացնելով դինամիկ ու հետաքրքրաշարժ պատմություն։ Սերիալը ներառում է 16 մաս, գլխավոր դերերում հանդես են գալիս սիրված դերասաններ Մկրտիչ Արզումանյանը և Լիանա Վանոյանը։
Պատմության կենտրոնում քննիչ Մոնիկան և նախկին սպա Մայիսն են, որոնք փորձում են բացահայտել քաղաքի խոշոր հանցախմբերից մեկի կազմակերպած հանցագործությունը՝ անցնելով իրադարձություններով լի և հաճախ ծիծաղաշարժ իրավիճակներով։
«Մենք կարևորում ենք մեր բաժանորդներին ժամանակակից և բարձրորակ բովանդակություն ներկայացնելը և շարունակելու ենք ընդլայնել Uplay հարթակի հնարավորությունները։ Ուրախ ենք, որ այս ֆիլմը հասանելի է Uplay-ում և մեր բաժանորդները հնարավորություն ունեն վայելելու հետաքրքիր պատմություններ և ժամանցի նման փորձառություն ունենալ», - նշեց Ucom-ի գլխավոր տնօրեն Ռալֆ Յիրիկյանը։
Ֆիլմի ստեղծագործական կազմում են․ Գլխավոր պրոդյուսեր՝ Ռոբերտ Օղլախչյանը, Գեղարվեստական ղեկավար և պրոդյուսեր՝ Սերգեյ Հայրապետյանը, ռեժիսոր՝ Հովհաննես Ղազարյանը, սցենարիստ՝ Նարեկ Ավագյանը։
Ցուցադրությանը ներկա էին հայտնի դերասաններ, մեդիայի ներկայացուցիչներ, բովանդակության ստեղծողներ և հյուրեր։ Դիտումից առաջ նրանք հնարավորություն ունեցան հանդիպելու դերասանական կազմի հետ, շփվելու ստեղծագործական թիմի հետ և դիտելու առաջին երկու սերիաները։
Ֆիլմի հաջորդ մասերը հասանելի են Uplay.am հարթակում, որտեղ ներկայացված են նաև հեռուստաալիքներ, ֆիլմեր, սերիալներ և նախագծեր՝ տարբեր ժանրերի սիրահարների համար։