Apple–ը կրկին զիջում է Samsung–ին սմարթֆոնների ամերիկյան շուկայում

ԵՐԵՎԱՆ, 19 օգոստոսի․/ԱՌԿԱ/․ Canalys վերլուծական ընկերությունը հրապարակել է զեկույց, որը ցույց է տալիս, որ 2025 թվականի երկրորդ եռամսյակում ԱՄՆ–ում Apple սմարթֆոնների վաճառքը 7 տոկոսով նվազել է։

3dnews.ru-ի փոխանցմամբ՝ հաղորդագրության մեջ նաև նշվում է, որ Samsung-ը զբաղեցրել է Apple-ի մասնաբաժնի մեծ մասը, այդ թվում՝ ԱՄՆ շուկայում իր ծալովի սարքերի հաջողության շնորհիվ։

Apple-ը նախկինի պես զբաղեցնում է ԱՄՆ շուկայի ահռելի 49%-ը, ինչը ցածր է՝ նախորդ տարվա 56%-ի համեմատ։ Այս ֆոնին հատկապես տպավորիչ է Samsung-ի սմարթֆոնների վաճառքի տարեկան 38% աճը։ Canalys-ի զեկույցում նաև նշվում է ԱՄՆ–ում Google Pixel և Motorola սարքերի վաճառքի աճը։ Միևնույն ժամանակ, Apple-ի վաճառքը նվազում է արդեն երկու եռամսյակ անընդմեջ, մինչդեռ Samsung-ի մասնաբաժինը կայուն աճ է գրանցում։

ԱՄՆ-ում ծալովի սմարթֆոնների մատակարարումները զգալի աճ են գրանցել՝ տարեկան մոտ 30%-ով։ Սակայն ծալովի սմարթֆոնները դեռևս կազմում են ԱՄՆ-ում սմարթֆոնների ընդհանուր վաճառքի միայն 1.6%-ը, քանի որ ԱՄՆ-ում վաճառքի զգալի մասը կատարվում է օպերատորների կողմից, որոնց սուբսիդիաները կազմում են ընդհանուր շուկայի մոտ 60%-ը։

Ծալովի սարքերի նկատմամբ հետաքրքրության այս աճը, անշուշտ, օգուտ կբերի Samsung-ին: Apple-ը նույնպես կարող է շահել ծալովի սարքերի տարածվածության աճից, հատկապես հաջորդ տարի Apple-ի առաջին ծալովի սարքի թողարկումից հետո: Վերլուծաբանները գնահատում են, որ հաջողության դեպքում Apple-ի ծալովի սմարթֆոնները երեք տարվա ընթացքում կարող են գրավել նման սարքերի ամերիկյան շուկայի 20-30%-ը: