Հայկական ՏՏ ընկերությունների ներկայացուցիչներն առաջարկում են տարածաշրջանային ՏՀՏ ենթակառուցվածքների զարգացման թվային քարտեզ ստեղծել

ԵՐԵՎԱՆ, 27 փետրվարի. /ԱՌԿԱ/. Հայկական ՏՏ ընկերությունների ներկայացուցիչները փետրվարի 25-26-ն Աղվերանում կայացած ՏՏ ոլորտի առաջնորդների «Առանց փողկապների հանդիպում» համաժողովի արդյունքում փաստաթուղթ են կազմել, որում, մասնավորապես, համապատասխան պետական գերատեսչություններին առաջարկում են ստեղծել տարածաշրջանային ՏՀՏ ենթակառուցվածքների ռազմավարական զարգացման թվային քարտեզ:

«Տարածաշրջանային ՏՀՏ ենթակառուցվածքների ռազմավարական զարգացման թվային քարտեզները կօգնեն խուսափել այսօր գոյություն ունեցող ենթակառուցվածքային վերարտադրությունից, կդառնան դրանց արդյունավետ օգտագործման երաշխիքը՝ տարանջատելով «ենթակառուցվածք» և «ծառայությունների տրամադրում» հասկացությունները, նրանք նաև կնպաստեն տեղական ինքնակառավարման մարմինների՝ այս ոլորտի զարգացման քաղաքականության մշակմանը, ինչն իր հերթին բարենպաստ պայման կդառնա երկրի մարզեր ներդրումների հոսքի համար», - նշվում է փաստաթղթում:

ՏՏ ոլորտի ներկայացուցիչներն առաջարկում են աշխատանքային խումբ ստեղծել՝ ՀՀ տրանսպորտի և կապի նախարարության ղեկավարությամբ, որում կներառվեն ՀՀ տարածքային կառավարման նախարարությունը, Պետական ունեցվածքի կառավարման վարչությունը, Կադաստրի պետական կոմիտեն, Երևանի քաղաքապետարանը, ՀՀ ոստիկանությունն ու Ազգային անվտանգության ծառայությունը, որը երկամսյա ժամկետում կկազմի և կներկայացնի ՏՀՏ ենթակառուցվածքների թվային քարտեզը:

Ըստ փաստաթղթի՝ հարկավոր է նաև Հայաստանի տարածքում գործող ընկերություններին, որոնք ՏՀՏ ենթակառուցվածքներ են օգտագործում, առաջարկել երկամսյա ժամկետում ներկայացնել սեփական ՏՀՏ ենթակառուցվածքների ծրագրերն ու այլ տվյալներ՝ թվային քարտեզում դրանք ներառելու համար:

Հայկական ՏՏ ընկերությունների ներկայացուցիչները մտադիր են նաև ՀՀ վարչապետին ներկայացնել համայնքային հեռահաղորդակցությունների զարգացման ծրագրերում ՏՀՏ ենթակառուցվածքները ներառելու անհրաժեշտությունը:

Համաժողովին մասնակցել են տարբեր նախարարությունների և գերատեսչությունների, ինչպես նաև ՏՏ ոլորտում գործող ընկերությունների ներկայացուցիչներ:

Համաժողովի օրակարգում ներառված էին այնպիսի հարցեր, ինչպիսիք են ՏՀՏ զարգացման ռազմավարությունը, հեռահաղորդակցության ոլորտում հանրային ծառայությունների կարգավորումը, ենթակառուցվածքների օգտագործումը (վիրտուալ օպերատոր, անցում մեկ այլ օպերատորի՝ համարի պահպանմամբ, ունիվերսալ ծառայություններ), հեռահաղորդակցական ենթակառուցվածքների զարգացման հեռանկարներն ու համայնքների ռազմավարական զարգացման նախագծերում դրանց ներառման հնարավորությունները, ինչպես նաև հեռահաղորդակցության ոլորտում մրցույթները:

Ֆորումի կազմակերպիչն է Տեղեկատվական տեխնելոգիաների ձեռնարկությունների միությունը (UITE)՝ ՀՀ կառավարության աջակցությամբ:-0-