Երևանում ազգային պարերին նվիրված հայ–հնդկական նախագծին նվիրված նամականիշեր են մարվել
ԵՐԵՎԱՆ, 29 օգոստոսի. /ԱՌԿԱ/. «Հայաստան-Հնդկաստան համատեղ թողարկում. Ազգային պարեր» թեմային նվիրված երկու նամականիշ մարվեց և շրջանառության մեջ դրվեց Երևանում։
Ինչպես հայտնեց «ՀայՓոստ» ՓԲԸ մամուլի ծառայությունը, նամականիշերի մարումն իրականացրին ՀՀ տրանսպորտի, կապի և տեղեկատվական տեխնոլոգիաների նախարարի տեղակալ Արմեն Արզումանյանը, Հայաստանի Հանրապետությունում Հնդկաստանի Հանրապետության արտակարգ և լիազոր դեսպան Յոգեշվար Սանգվանը, Հնդկաստանի փոստի՝ ֆիլատելիայի գծով փոխտնօրեն Շրի Աբհինավ Պրատապ Սինքխը, «ՀայՓոստ Թրասթ Մենեջմենթի» գլխավոր տնօրեն Խուան Պաբլո Գեչիջյանը, Հայաստանի ֆիլատելիստների միության նախագահ Հովիկ Մուսայելյանը:
Առաջին նամականիշի վրա պատկերված է հայկական «Հով արեք» պարը, որի հիմքում ընկած է Կոմիտասի հավաքածուում ներառված «Հով արեք, սարեր ջան» քնարական ժողովրդական երգը։
Երկրորդ նամականիշին պատկերված է հնդկական «Մանիպուրի» պարը, որը հնդկական դասական պարային հիմնական ոճերից է:
Հայկական նամականիշի հեղինակը Վահագն Մկրտչյանն է, իսկ հնդկական
նամականիշի հեղինակը՝ Սուրեշ Կումարը:
Նամականիշերի անվանական արժեքը կազմում է 280 դրամ (մոտ 60 ցենտ)։ Նամականիշերը տպվել են Ֆրանսիայի «Cartor» տպագրատանը` 40.000-ական օրինակ տպաքանակով։ -0-