«Զարմանալի ճամփորդություն»․ Երևանում մեկնարկել է WCIT 2024/DigiTec խոշորագույն կոնգրեսը
ԵՐԵՎԱՆ, 3 հոկտեմբերի․/ԱՌԿԱ/․ Նորարարությունների և տեխնոլոգիաների համաշխարհային կոնգրեսը՝ WCIT 2024/DigiTec մեկնարկել է շաբաթ օրը Երևանի Կ. Դեմիրճյանի անվան մարզահամերգային համալիրում «Մտքի ուժը. արհեստական բանականությունը սահմաններից այն կողմ» կարգախոսի ներքո։
Ինչպես ավելի վաղ նշել էր Առաջատար տեխնոլոգիաների ձեռնարկությունների միության (ԱՏՁՄ) ղեկավար Ալեքսանդր Եսայանը, կոնգրեսը կդառնա Հայաստանի ՏՏ ոլորտի և խոշորագույն իրադարձություններից մեկն աշխարհում։
«Մենք սկսում ենք եռօրյա ճամփորդությունը՝ խորհելով արհեստական բանականության, դրա իրականացման մասին։ Զարմանալի ճամփորդություն է լինելու մեզ համար։ Սա շատ կարևոր միջոցառում է մեզ համար, քանի որ Հայաստանի համար մեծ պատիվ է երկրորդ անգամ հյուրընկալել նման կարևոր միջոցառում»,- ասաց WCIT–ի գործադիր տնօրեն Հայկ Կարապետյանը մամուլի ասուլիսի ժամանակ։
Մարվեց նաև WCIT-ին նվիրված նամականիշի բլոկը։ 500 դրամ անվանական արժեքով նամականիշի վրա պատկերված է ֆորումի տարբերանշանը, իսկ նամականիշի բլոկի վրա Արագած լեռն է և «Նորարարությունների և տեխնոլոգիաների համաշխարհային կոնգրես» հայերեն և անգլերեն մակագրությունը։ Շրջանառությունը 10 հազար հատ է։
Հայաստան ժամանող հարյուրավոր մասնակիցներ կքննարկեն թեմաներ, որոնք առնչվում են արհեստական բանականությանն ու դրա կապին բիզնեսի հետ, նոր միտումներին և զարգացման ուղղություններին։
Ակնկալվում է, որ ընթացիկ ֆորումին կմասնակցեն NVIDIA-ի, TikTok-ի, Microsoft-ի, վենչուրային հիմնադրամների ներկայացուցիչները, աշխարհահռչակ ֆուտբոլիստ Լեո Մեսսիի կառավարման տնօրեն Ռոդրիգո Մեսսին, Graph Ventures վենչուրային ընկերության գործընկերը, Play Time-ի մենեջեր Ռազմիկ Հովակիմյանը։
Մինչև հոկտեմբերի 7–ն ընթացող կոնգրեսի շրջանակում կկազմակերպվի նաև դրոնների workshop:
WCIT 2024/DigTec–ի մասին
WCIT 2024 կոնգրեսը կանցկացվի 2024 թվականի հոկտեմբերի 4-7-ը Երևանի Կ․ Դեմիրճյանի մարզահամերգային համալիրում՝ «Մտքի ուժը. արհեստական բանականությունը սահմաններից այն կողմ» կարգախոսով։ Միաժամանակ «Մերիդիան» էքսպո կենտրոնում կանցկացվի DigiTec ամենամյա ՏՏ ցուցահանդեսը։ Երկու տարածքների միջև կերթևեկեն հատուկ շաթլներ։
Չորս օրվա ընթացքում WCIT 2024/DigiTec-ը Հայաստանը կվերածի տեխնոլոգիական մտքի կենտրոնի` դառնալով ոլորտի առաջատար բանախոսների ելույթների, պանելային քննարկումների և B2B հանդիպումների հարթակ: Նախատեսվում է անցկացնել WITSA World Cup մրցույթը մոտ 20 երկրներից ընտրված ստարտափերի միջև, կանցկացվեն նորարարական ցուցադրություններ, բիզնես շնորհանդեսներ, սեմինարներ և այլ միջոցառումներ։
Կոնգրեսի մասին
Նորարարությունների և տեխնոլոգիաների համաշխարհային համաժողովը (WCIT) հեղինակավոր համաշխարհային միջոցառում է, որը կազմակերպվել է ՏՏ և ծառայությունների համաշխարհային դաշինքի (WITSA) կողմից: WCIT-ը համախմբում է տեխնոլոգիայի առաջնորդներին, ոլորտի մասնագետներին, կառավարության ներկայացուցիչներին ամբողջ աշխարհից՝ ուսումնասիրելու և ձևավորելու տեխնոլոգիայի ապագան և դրա ազդեցությունը հասարակության վրա:
«ԱՌԿԱ» լրատվական գործակալությունը WCIT2024-ի ինֆորմացիոն հովանավորն է։