Ucom-ի տնօրենը նվերներ է հանձնել «ԱրմՌոբոտիքս 2017» մրցույթի հաղթող ճանաչված «Արմաթ»-ի սաներին
ԵՐԵՎԱՆ, 3 նոյեմբերի. /ԱՌԿԱ/. Ucom ընկերության գլխավոր տնօրեն Հայկ Եսայանը պլանշետներ է հանձնել Տավուշի մարզի սահմանամերձ Արծվաբերդ գյուղի «Արմաթ» ինժեներական լաբորատորիայի սաներին, հայտնում է ընկերության մամուլի ծառայությունը:
«Լաբորատորիան Ucom ընկերության աջակցությամբ բացվել է երկու տարի առաջ ու կարճ ժամանակահատվածում արդարացրել է նախագծի պատասխանատուների սպասելիքները հայ-ադրբեջանական սահմանին ապրող պատանի ինժեներներից ու ծրագրավորողներից», – նշվում է տարածած հաղորդագրությունում:
«Ինֆորմացիոն տեխնոլոգիաների ձեռնարկությունների միության (ԻՏՁՄ) կողմից իրականացվող ռոբոտների 10-րդ՝ հոբելյանական առաջնությունում Արծվաբերդի արմաթցիներն այնպիսի ռոբոտ էին պատրաստել, որն ըստ մրցույթի կանոնների, պետք է մրցութային դաշտում իրեր գտներ (խորանարդ, գունդ և ուռուցիկ բազմանկյուն), վերցներ դրանք և տեղափոխեր տվյալ ռոբոտին հատկացված պահեստային տարածք: Մասնագետները վստահեցնում են, որ տվյալ մրցույթն իր օտարերկյա համարժեքներից ավելի բարդ է: 3 ամսվա աշխատանքի արդյունքում եզրափակիչ փուլ էին անցել 12 թիմեր Տավուշի, Լոռու, Գեղարքունիքի, Շիրակի մարզերից, ինչպես նաև Երևանից», – հայտնում են ընկերությունից:
3-հոգանոց մրցանակակիր թիմն այսօր Արծվաբերդի հպարտությունն է: 700 հազար դրամ մրցանակն օգտագործելու են այլ նորարարական նախագծեր իրականացնելու նպատակով:
«Փոքրուց եմ ինչ-որ առարկաներ քանդել ու հավաքել, բայց «Արմաթ»-ի շնորհիվ է, որ սկսել եմ մտածել, թե ինչ կարելի է ստեղծել ուրիշների գործը թեթևացնելու համար: Օրինակ՝ հիմա մտածում եմ գյուղի համար օգտակար մի չորանոց նախագծելու մասին, որը կաշխատի արևային մարտկոցով, ու բոլոր գործողությունները կլինեն ավտոմատացված: Խնձոր լվանալը, կտրատելը, դասավորելը, չորացնելը պետք է իրականացվի սարքավորման միջոցով», - իր պլաններով կիսվեց Արծվաբերդի «Արմաթ» ինժեներական լաբորատորիայի սան Վահագն Զարգարյանը:
Վահագնը նախագծել է խելացի դռան մոդել, ստեղծել է ռադիոկապով աշխատող սարքեր, իր իսկ ձեռքով հավաքել է արևային մարտկոց: Սեփական ննջասենյակը դարձրել է մինի-լաբորատորիա, որտեղ մտնելու համար իր ստեղծած անվտանգության սարքի վրա կոդ է հավաքում:
«Այս այցն ինձ համար անձամբ ամենաոգևորիչն է: Եթե 16-ամյա Վահագնի թիմը մասնակցեր ԱՄՆ-ում կայացած ռոբոտների մրցույթին, որի առաջադրանքը Հայաստանի մրցույթի խնդրի համեմատ ավելի հեշտ էր, վստահաբար, առաջին տեղը կգրավեր: «Արմաթ» լաբորատորիաների ներդրման նախագիծը երկարատև է, ֆունդամենտալ ու ինժեներական մտածողություն ձևավորող: Դրա արդյունքը մակերեսային ու այժմեական չէ, այն խորքային փոփոխություններ է առաջացնելու կրթական համակարգում, ինչի ականատեսը կլինենք 4-5 տարի հետո », - նշեց Ucom ընկերության գլխավոր տնօրեն Հայկ Եսայանը:
«Հիշեցնենք, որ Ucom ընկերությունը հանդիսանում է «Արմաթ» ինժեներական լաբորատորիաների ներդրման խոշորագույն աջակիցը: Ucom-ի մոտ 150 մլն դրամ ներդրման շնորհիվ Հայաստանի մի շարք մարզերում, այդ թվում՝ սահմանամերձ բնակավայրերում գործում են 39 «Արմաթ» ինժեներական լաբորատորիաներ», – նշված է հաղորդագրությունում:
«Յուքոմ» ընկերությունը Հայաստանում 2009թ. սկսած կառուցել է գերժամանակակից օպտիկամանրաթելային ցանց, որը հնարավորություն է տալիս մեկ կապուղով մատուցել երեք ծառայություն՝ ինտերնետ, հեռուստատեսային ծառայություն և հեռախոսակապ: 2015թ. հունիսի դրությամբ ընկերությունն ունի ավելի քան 100 000 բաժանորդ և 800-ից ավելի աշխատակից: Համագործակցելով համաշխարհային գերհզոր ընկերությունների հետ` «Յուքոմը» կարողացել է իր հաստատուն դիրքը գրավել Հայաստանի հեռահաղորդակցման շուկայում: –0–