Հայաստանը պատրաստ է Microsoft–ի հետ քննարկել նոր ուղղություններով երկարաժամկետ համագործակցությունը

ԵՐԵՎԱՆ, 10 սեպտեմբերի. /ԱՌԿԱ/. Հայաստանի վարչապետ Հովիկ Աբրահամյանը  «Մայքրոսոֆթ» ընկերության Կենտրոնական և Արևելյան Եվրոպայի նոր շուկաների գլխավոր մենեջեր Փիլար Թորեսի հետ հանդիպմանն առաջարկել է քննարկել Հայաստանի ՏՏ ոլորտի հեռանկարային ծրագրերի իրականացման և նոր ուղղություններով երկարաժամկետ համագործակցության հարցեր։

Ինչպես հայտնում է հայկական կառավարության մամուլի ծառայությունը, կառավարության ղեկավարը, մասնավորապես, անդրադարձել է «Մայքրոսոֆթ» ինովացիոն կենտրոնի հենքի վրա «Մայքրոսոֆթ Վենչուրս» աքսելերատոր ստեղծելու և մոբայլ լուծումների/մշակումների կենտրոն հիմնելու հնարավորություններին:

Վարչապետը նշել է, որ տեղեկատվական տեխնոլոգիաների ոլորտը Հայաստանում ամենաարագ զարգացող ճյուղերից մեկն է:

«Ոլորտը զարգացման մեծ ներուժ ունի և համարվում է ՀՀ կառավարության ծրագրի առանցքային ուղղություններից մեկը»,- նշել է Հովիկ Աբրահամյանը:

Աբրահամյանը վստահեցրել է, որ ՀՀ կառավարությունը շահագրգռված է «Մայքրոսոֆթ»-ի հետ համագործակցությունը շարունակելու և ընդլայնելու գործում:

Փիլար Թորեսն իր հերթին ողջունել է ՀՀ կառավարության նախաձեռնությունն՝ ուղղված ՏՏ բնագավառի զարգացման ծրագրերի իրականացմանը և վստահություն հայտնել երկկողմ համագործակցության ընդլայնման հարցում:

Նա նաև կարևորել է փոխգործակցությունը մտավոր սեփականության, քաղաքացիների իրավունքների պաշտպանության և կիբեռհանցագործությունների դեմ պայքարում:

Այնուհետև զրուցակիցները քննարկել են ՀՀ կառավարության և «Մայքրոսոֆթ» ընկերության միջև փոխըմբռնման նոր հուշագրի ստորագրմանն առնչվող հարցեր:

Microsoft կորպորացիան Հայաստանի հետ համագործակցում է 2007 թվականի հունվարի 30–ին Էդինբուրգում ստորագրած համաձայնագրի շրջանակում, որին համապատասխան` Microsoft–ը Հայաստանում մի շարք ներդրումային, կրթական և նորարարական ծրագրեր է իրականացնում, որոնց թվում է նաև Հայաստանում Microsoft նորարարական կենտրոնի բացումը։-0-