Հայաստանում ինտերնետից օգտվում է բնակչության մոտ 67%–ը. ՀՀ վարչապետ

ԵՐԵՎԱՆ, 15 դեկտեմբերի. /ԱՌԿԱ/. Հայաստանի բնակիչների մոտ 67 տոկոսն օգտվում է ինտերնետից, ասվում է Հայաստանի վարչապետ Հովիկ Աբրահամյանի ելույթում, որը ներկայացրել է Հայաստանի կառավարության աշխատակազմի ղեկավար–նախարար Դավիթ Հարությունյանը «Էլեկտրոնային Հայաստան» ծրագրի շնորհանդեսի ժամանակ։

«Այսօր կարող ենք փաստել, որ Հայաստանի բնակչության մոտ 67 տոկոսն օգտվում է ինտերնետից, իսկ Համաշխարհային սարդոստայնին ընկերությունների հասանելիությունը հասնում է 82 տոկոսի։ Այդ ցուցանիշն արդեն կարելի է համեմատել ԵՄ երկրների հետ, այն տարածաշրջանում ամենաբարձր ցուցանիշներից է։ Միաժամանակ ամբողջ Հայաստանում ցանցի հասանելիությունը գործնականորեն նույնն է, ինչի հաշվին մարզերի բնակիչներն օգտվում են ցանցից մայրաքաղաքի բնակիչների հետ հավասար»,– ասվում է Աբրահամյանի ուղերձում։ 

Հայաստանի կառավարությունն էլեկտրոնային կառավարման համակարգի ներդրման գործընթաց է նախաձեռնել 2010 թվականին քաղաքացիների և պաշտոնյաների շփումը նվազեցնելու համար միջավայրի ստեղծման նպատակով, ինչի արդյունքում ծրագրվում էր կրճատել կոռուպցիոն ռիսկերը և բարձրացնել մատուցվող ծառայությունների հասանելիությունը։ 

Վարչապետի համոզմամբ, ծրագրի իրագործման շնորհիվ Հայաստանում էլեկտրոնային կառավարման համակարգի զարգացումն անցել է որակապես նոր մակարդակի։ 

Նա միաժամանակ նշել է, որ ՄԱԿ–ի էլեկտրոնային կառավարման պատրաստակամության ցուցիչով Հայաստանը 2014 թվականին զբաղեցնում է 61–րդ տեղը 2012 թվականի 94–րդ տեղի դիմաց։

Որպես ոլորտի բարեփոխումներ` վարչապետը նշել է ՔԿԱԳ–ների գրանցման էլեկտրոնային համակարգի ներդրումը, ինչը կարևոր քայլ է նույնականացման էլեկտրոնային համակարգի բարելավման հարցում։ Կարևոր բաղադրիչ է նաև ոստիկանության մատուցած ծառայությունների էլեկտրոնային համակարգի օգտագործումը։ Օրինակ, մշակված ցանցային լուծումների շնորհիվ կարող է իրազեկել վարորդներին ՃՏԿ խախտումների համար տուգանքների մասին, որոնք կարելի է վճարել նաև օնլայն ռեժիմով։ 

«Այս դրական միտումներին զուգընթաց հարկ է նշել, որ տեղեկատվական տեխնոլոգիաների և էլեկտրոնային կառավարման էական ներուժը դեռ մինչև վերջ իրագործված չէ, քանի որ էլեկտրոնային ծառայությունների օգտագործողների թիվն առայժմ փոքր է, և շատ բան դեռ կա անելու այս ուղղությամբ»,– ասվում է Աբրահամյանի ուղերձում։ 

Նա նշել է նաև, որ Հայաստանի կառավարությունը կոնկրետ քայլեր է կատարում էլեկտրոնային հասարակության զարգացման շուրջ և այս հարցում բարձր է գնահատում ԵՄ–ի և այլ դոնորների օժանդակությունը։

Հայաստանի կառավարության տվյալենրով, Հայաստանի օգտագործողների 34 տոկոսը նախընտրում է բջջային Ինտերնետ, և միայն 15-20 տոկոսն է օգտագործում ինտերնետը որպես ժամանցի տեսակ։

«Հայաստան-էլեկտրոնային կառավարման համակարգային զարգացում» ծրագիրը մեկնարկել է 2012 թ. (տևողությունը` 24 ամիս): Այն ֆինանսավորվում է Եվրոպական միության կողմից, արժեքը 1.4 մլն եվրո է:-0-