«ԱրմենՏելը» դարձել է Հայաստանի երիտասարդ ստեղծագործողների Հանրապետական Երրորդ մրցույթ-ցուցահանդեսի գործընկերը
ԵՐԵՎԱՆ, 21 փետրվարի. /ԱՌԿԱ/. «ԱրմենՏել» ընկերությունը (ապրանքանիշը՝ Beeline) դարձել է Հայաստանի երիտասարդ ստեղծագործողների Հանրապետական երրորդ մրցույթ-ցուցահանդեսի գործընկերը, հաղորդում է ընկերության մամուլի ծառայությունը:
Երիտասարդ ստեղծագործողների Հանրապետական երրորդ մրցույթ-ցուցահանդեսը նվիրված է սիրո և երիտասարդության տոնին: Ցուցահանդեսն անցկացվում է ամեն տարի Սիրո արագահաս բարեխոս Սբ. Սարգսի օրը: Միջոցառման նպատակը Հայաստանում և արտասահմանում հայկական գեղարվեստական և մշակութային արժեքների պահպանումն ու տարածումն է: Ցուցահանդեսին ներկայացված երիտասարդ ստեղծագործողների աշխատանքները նվիրված են սիրո թեմային:
«Հետամուտ լինելով բիզնեսի սոցիալական պատասխանատվության սկզբունքներին՝ «ԱրմենՏել» ընկերությունը շարունակում է աջակցել տաղանդավոր երիտասարդներին՝ նպաստելով նրանց ստեղծագործ զարգացմանը և խրախուսելով նախաձեռնությունները` հանուն Հայաստանի», - ասել է «ԱրմենՏել» ՓԲԸ-ի Գլխավոր տնօրեն Իգոր Կլիմկոն:
Լավագույն աշխատանքների մրցույթը կանցկացվի 4 անվանակարգում` գրաֆիկա, գեղանկարչություն, քանդակագործություն և դեկորատիվ-կիրառական արվեստ: Յուրաքանչյուր անվանակարգում կտրվեն մրցանակներ առաջին, երկրորդ և երրորդ տեղերի համար:
Ցուցահանդեսն անցկացվում է Հայաստանի Հանրապետության նախագահ Սերժ Սարգսյանի բարձր հովանու ներքո: Միջոցառման կազմակերպիչն է «Աշխարհի Հայ նկարիչների Միավորումը»:
«ԱրմենՏել» ՓԲԸ-ն «ՎիմպելԿոմ» ընկերության դուստր ձեռնարկությունն է, 2007 թ.-ի ապրիլից «ԱրմենՏել»-ի 100 տոկոս բաժնետոմսերը պատկանում են ռուսական ընկերությանը: «ԱրմենՏել» ընկերությունը տրամադրում է ֆիքսված և բջջային կապի, ինչպես նաև գերարագ ինտերնետի ծառայություններ:-0-