ՀՀ ԿԲ․ կիբեռհարձակումները կարելի է պատվիրել, ինչպես պիցցան
ԵՐԵՎԱՆ, 22 հոկտեմբերի․/ԱՌԿԱ/․ Կիբեռսպառնալիքները Հայաստանի բանկային համակարգի համար վերջին տարիներին փոխվել են, եթե տասը տարի առաջ շատերը Հայաստանը համարում էին փոքր երկիր, որը գրավիչ չէր հաքերների և կիբեռհանցագործների համար, ապա այսօր զանգվածային կիբեռհարձակումները կարելի է պատվիրել որպես ծառայություն։
«Ցավոք, այսօր կիբեռհարձակումն այնպիսի ծառայություն է, ինչպես պիցցա պատվիրելը: Կան բազմաթիվ ծառայություններ, որոնց մոտ կարելի է պատվիրել զանգվածային ֆիշինգային կամ DdoS հարձակում», – «Նովոստի–Արմենիա»–ին տված հարցազրույցում հայտարարել է ՀՀ Կենտրոնական բանկի տեղեկատվական տեխնոլոգիաների և կիբեռանվտանգության տնօրեն Կոմիտաս Ստեփանյանը։
Նրա խոսքով, տասը տարի առաջ շատերը Հայաստանը համարում էին փոքր երկիր, որը գրավիչ չէր հաքերների և կիբեռհանցագործների համար։ Այն ժամանակ առցանց գործարքների մակարդակը շատ ցածր էր։ Սակայն արագ թվայնացումը, որը տեղի ունեցավ ինչպես երկրում, այնպես էլ, մասնավորապես, ֆինանսական հատվածում, ստեղծել է նոր սպառնալիքներ։
«Եթե պատկերացնենք համացանցը որպես օվկիանոս, ապա մենք մի ժամանակ եղել ենք լիճ՝ առանց դեպի օվկիանոս ելքի, իսկ հիմա դարձել ենք ծով և հաղորդակցվում ենք օվկիանոսի հետ, թեկուզ նուրբ ալիքի միջոցով», – պարզաբանել է Ստեփանյանը։
Նա ընդգծել է, որ այսօր կիբեռհարձակումը կարող է ուղղված չլինել անմիջապես թիրախային կազմակերպությանը (որը լավ պաշտպանված է), այլ այդ կազմակերպությանը ծառայություն մատակարարողներին, որոնք չունեն բավարար միջոցներ և ռեսուրսներ արդյունավետ պաշտպանության համար:
Նրա խոսքով, կիբեռհանցագործները կարող են հասնել թիրախային կազմակերպությանը պարզ ֆիշինգային նամակի կամ մատակարարի ապրանքների կամ ծառայությունների մեջ կիբեռներթափանցման միջոցով։
Ամբողջ հարցազրույցին կարող եք ծանոթանալ հետևյալ հղումով