Առաջին «հայկական պլանշետ» կամ «Լավագույնը` երեխաներին»

ԵՐԵՎԱՆ, 11 փետրվարի. /ԱՌԿԱ/. Նախորդ շաբաթ Երևանում անցկացվեց ArmTab հայկական առաջին պլանշետների շնորհանդեսը, որին մասնակցեցին Հայաստանի վարչապետ Տիգրան Սարգսյանը, Էկոնոմիկայի և Կրթության ու գիտության նախարարներ Վահրամ Ավանեսյանը և Արմեն Աշոտյանը։

Հայկական պլանշետ, որը հավաքվում է ԱՄՆ–ում և Հոնկոնգում

Android օպերացիոն համակարգով ArmTab առաջին հայկական պլանշետների (ինչպես նաև ArmPhone սմարթֆոնների, որոնց շնորհանդեսը դեռ չի կայացել) արտադրությամբ զբաղվում է 2013 թվականի հոկտեմբերի 11–ին հիմնված  Technology and Science Dynamics Inc.  ընկերությունը։ Միաժամանակ հարկ է նշել, որ Հայաստանում առայժմ իրականացվում է պլանշետների միայն դիզայնը և ծրագրային ապահովումը, իսկ հավաքվում են դրանք ԱՄՆ–ում և Հոնկոնգում։

Ինչպես շնորհանդեսի ընթացքում հայտնեց Technology and Science Dynamics Inc.–ի հիմնադիր Վահան Շաքարյանը, ArmTab–ի բոլոր դետալները ներկրվում են, սակայն դրա վրա դրված օպերացիոն համակարգը հայ մասնագետների մշակումն է։ «Պլանշետներում տեղադրված է «Արաքս» առաջին հայկական օպերացիոն համակարգը և «Ոստան» աշխատանքային տիրույթը, որոնք մշակել է Instigate ընկերությունը։ Դրանք փորձարկվել են և լիարժեք աշխատում են ArmTab պլանշետների վրա»,– ասել է նա։

Շաքարյանն ավելացրեց նաև, որ ընկերությունը կառավարության որոշմամբ ստացել է գործունեության ծավալման սկզբնական թույլտվություն ազատ տնտեսական գոտում` «ՌԱՕ ՄԱՐՍ» ՓԲԸ–ի տարածքում և բավականին արագ ստացել է անհրաժեշտ փաստաթղթերը, և այժմ ծրագրում է առաջիկա ամիսներին ավարտել գործարանի կառուցումը և Հայաստանում ArmTab պլանշետների արտադրություն ծավալել։
 
«Շուտով մենք նախատեսում ենք ArmTab–ի արտաքին դիզայնի, motherboard–ի դիզայնի, ծրագրային ապահովագրման աշխատանքներն իրականացնել բացառապես Հայաստանում, քանի որ փորձը ցույց է տալիս, որ հայ ծրագրավորողները տրամադրում են բարձրորակ արտադրանք, որը չի զիջի իր համաշխարհային նմանակներին», – ասաց Շաքարյանը։

Հայաստանի էկոնոմիկայի նախարար Վահրամ Ավանեսյանն ArmTab–ի շնորհանդեսի ընթացքում իր հերթին նշեց, որ Technology and Science Dynamics Inc.–ի ներդրումները Հայաստանի տնտեսական ազատ գոտում հայկական պլանշետների արտադրության նախագծում առաջիկա 3 տարիներին կկազմեն մոտ 6.7 մլն դոլար։ Համաձայն բիզնես–ծրագրի, ընկերությունը պլանշետներ կհավաքի և ծրագրեր կտեղադրի։ Աշխատանքի առաջին տարում ընկերությունը պատրաստվում է վաճառել 10 հազար պլանշետ, իսկ երկրորդ և երրորդ տարիներին, համապատասխանաբար, 30 և 50 հազար պլանշետ։

Նա նշեց, որ Technology and Science Dynamics Inc.–ը Հայաստանի ազատ տնտեսական գոտում գրանցված առաջին ՏՀՏ  ընկերությունն է և օրինակ կծառայի մյուսների համար, իսկ կառավարությունն իր կողմից կանի ամեն ինչ, որ դրա գործունեությունն արդյունավետ և եկամտաբեր լինի։

«Նախաձեռնությունը, նախևառաջ, խոսում է այն մասին, որ Հայաստանում տեխնոլոգիական ոլորտի զարգացման հնարավորություն կա և ՏՏ զարգացումը հանգեցնում է ուղեկից ոլորտների, մասնավորապես, ճարտարագիտության զարգացման, ինչը հատկապես կարևոր է երկրի համար և կարող է դառնալ գերակայություններից մեկը»,– ավելացրեց Ավանեսյանը։

Անցած տարի «ԱՌԿԱ» գործակալության հետ զրույցում Շաքարյանն ասել էր, որ եթե խոսքը միայն վերաբերի պատրաստի դետալները հավաքելուն, ապա անհրաժեշտ ներդրումները կկազմեն մոտ 1–5 մլն դոլար։  Եթե մենք որոշում կայացնենք Հայաստանի տարածքում որոշ տեխնիկական կոմպոնենտների արտադրության մասին, մասնավորապես` չիպերի և պլատաների, ապա խոսքը կվերաբերի մի քանի տասնյակ միլիոն դոլարի։

Ի՞նչ արժե

Թեև Շաքարյանը չնշեց ընկերության գնային քաղաքականությունը, սակայն նախորդ տարվա դեկտեմբերին նա ասել էր, որ որակի առումով այդ պլանշետները ոչնչով չեն զիջում համաշխարհային հայտնի ապրանքանիշերին։ Ըստ նրա, արտադրանքը ծրագրվում է արտահանել ԵՄ, ԱՊՀ և ԱՄՆ։
 
Նա հայտնել էր նաև, որ Cortex 4–միջուկային պրոցեսորով, 2 ԳԲ հիշողությամբ և ներկառուցված 16 ԳԲ հիշողությամբ 9,7 դյույմ անկյունագծով պլանշետը կարժենա մոտ 100 հազար դրամ (մոտ 243 դոլար), իսկ 7,85 դյույմ անկյունագծովը` 85 հազար դրամ (մոտ 207 դոլար)։

Պլանշետին զուգընթաց դեկտեմբերին Շաքարյանը ներկայացրեց նաև ArmPhone սմարթֆոնների որոշ տեխնիկական տվյալներ և մոտավոր գինը, նշելով, որ դեռևս կա փորձնական հավաքած մեկ հեռախոս։ «Մեր մոտավոր հաշվարկներով, այն կարժենա 185-200 դոլար... Դրա գինը դեռ վերջնականորեն որոշված չէ»,– նշեց նա։

Ինչ վերաբերում է սմարթֆոնի տեխնիկական տվյալներին, ապա ArmPhone–ն աշխատում է Android 4.2.2 օպերացիոն համակարգով, պրոցեսորի հզորությունը` 1.2 գիգահերց, զինված է 4 միջուկով։ Օպերատիվ հիշողությունը 1 Գիգաբայթ է, չիպինը` 4 գիգաբայթ, ունի MicroSD քարտի տեղ և մինչև 32 Գիգաբայթ հիշողությունն ավելացնելու հնարավորություն։ Հետին պանելի խցիկն ունի 8 մեգապիքսել ընդլայնում, դիմային պանելինը` 1.3 մեգապիքսել, էկրանը` 1280*720 պիքսելով 5.5 դյույմ է։ Շաքարյանի խոսքով, իր հնարավորություններով ArmPhone–ն ավելի մոտ է Samsung–ին, քան  iPhone–ին, և «որոշ պարամետրերով ArmPhone–ը նույնիսկ գերազանցում է Samsung–ը, օրինակ, ֆոտոխցիկի հզորությամբ»։
 
Յուրաքանչյուր առաջին դասարանցուն մեկ պլանշետ

Աշխատանքի առաջին տարում Technology and Science Dynamics Inc. ընկերությունը պատրաստվում է վաճառել 10 հազար պլանշետ, իսկ երկրորդ և երրորդ տարիներին, համապատասխանաբար, 30 և 50 հազար պլանշետ։ Այդ ծրագրերը կարելի էր ընկալել որպես չափազանց լավատեսական, եթե շնորհանդեսի ընթացքում չստորագրվել համագործակցության հուշագիր ընկերության և Հայաստանի կրթության և գիտության միջև, որի համաձայն, 2015 թվականից հայ առաջին դասարանցիներն մեկական ArmTab կստանան։

«ArmTab–ը պետք է հայկական արտադրանք դառնա ոչ միայն արտադրության երկրով, այլև իր բովանդակությամբ։ Բնականաբար, այն առաջին հերթին կրթական բովանդակություն ունի», – ասաց կրթության և գիտության նախարար Արմեն Աշոտյանը։

Նա նշեց նաև, որ ծրագիրը նախատեսվում էր իրականացնել 2016 թ.–ից, սակայն հաշվի առնելով կառավարության առաջնահերթությունները, ռեսուրսների առկայությունն ու ArmTab հայկական պլանշետների դուրս գալը հայկական շուկա` հնարավորություն ստեղծվեց ծրագիրն իրականացնել արդեն 2015 թ.–ից։   

Հայաստանի վարչապետ Տիգրան Սարգսյանն իր հերթին ընդգծեց, որ համակարգիչները պետք է դպրոցականների համար հասանելի լինեն Հայաստանի բոլոր 1400 դպրոցներում, և ավելացրեց, որ հայկական պլանշետների սեփական արտադրության որոշումը համահունչ է կառավարության ծրագրին։ «Ուրախ եմ, որ մենք գտանք այն գործընկերոջը, որը կկարողանա իրագործել այս կարևորագույն ազգային ծրագիրը»,– նշեց նա։

Պետք է նշել, որ դեռ դեկտեմբերի սկզբին Տիգրան Սարգսյանը նվեր ստացած իր առաջին հայկական ArmTab պլանշետը տվել է դպրոցական որդուն, ով դրա դիմաց նրան է տվել իր ամերիկյան պլանշետը։ «Նա օգտվում է պլանշետից, հպարտանում է դրանով և պարծենում, որ աշխատում է հայկական պլանշետով, այնպես որ դա սպասված արտադրանք է», – ասել է Սարգսյանը։

Սոցցանցերում ծավալված քննադատությունը

Հարկ է նշել, որ «հայկական առաջին պլանշետների» աղմուկ հանած շնորհանդեսը Հայաստանում ոչ բոլորի հավանությանն արժանացավ։ Շատերը տրամաբանորեն նկատեցին, որ այդքան էլ կոռեկտ չէ այլ երկրներում հավաքվող և Android-ով աշխատող  (ինչպես էլ այն վերանվանեն) պլանշետները հայկական անվանել։

Եղել են նաև նկատողություններ այն ArmTab–երի գնի վերաբերյալ, որոնք կառավարությունը ծրագրում է բաժանել առաջին դասարանցիներին։ Facebook–ի որոշ օգտագործողներ նշում էին, որ եթե լավ փնտրենք Համացանցում, ապա կարող ենք ավելի էժան գնով գտնել «հայկական» պլանշետներին իրենց բնութագրերով գերազանցող պլանշետներ։

Երկիրը միաժամանակ ներուժ ունի տեղեկատվական տեխնոլոգիաների ոլորտում, ինչի մասին վկայում են Հայաստանում ՏՏ ոլորտի հաջողությունները։ Ոլորտը հայկական տնտեսության ամենադինամիկ զարգացողներից մեկն է։ Մասնավորապես, ոլորտի աճը 2013 թվականին կազմել է 20 տոկոս։

Հայաստանի ներուժի մասին են վկայում նաև երկրի հետ ՏՏ ոլորտի համաշխարհային առաջատար ընկերությունների համագործակցությունը։ Դրանք հանրապետությունում բացում են սեփական լաբորատորիաները և տարածաշրջանային կենտրոնները, իսկ լավագույն ուսանողները սկսում են համատեղել ուսումն այդ ընկերություններում աշխատանքի հետ։

Հարկ է հիշեցնել նաև, որ Հայաստանը հարուստ ավանդույթ ունի բարձր տեխնոլոգիական արտադրանքի արտադրության բնագավառում, և տարբեր գնահատականներով, հանրապետությունում մշակվել և արտադրվել է ռազմական և տիեզերական նպատակներով օգտագործվող էլեկտրոնային ամբողջ արտադրանքի 30-40 տոկոսը։

Այս ամենը հույս է ներշնչում, որ առաջիկա տարիներին հանրապետությունում իսկապես հայկական գաջեթների արտադրություն կսկսվի։ -0-

Հայկ Խալաթյան
«ԱՌԿԱ» գործակալության թղթակից